Plantun de Prouvènço

Pèr coumpara dos planto d'encò nostre

Festuca laevigata & Picea abies

Festuca laevigata

Poaceae Graminaceae

Nom en français : Fétuque courbée.

Descripcioun :
Aquesto petugo trachis en mato dins li tepiero seco, roucaio e esboudèu de mountagno, subretout sus lis adré secarous e cauquié. Es uno planto chanchadisso mai pulèu grando emé uno paniculo de 6 à 13 cm de long. Lis espigueto longo de 9 à 11 mm caupon 4 à 5 flour. Li lemma soun longo de 6 à 7,5 mm e porton uno arèsto de mai de 2,5 mm (-> 3,5 mm). Pèr ço que toco li coupo dóu limbe de la fueio, l'esclerenchime èi prim e pulèu de countùni. Apoundèn que la lengueto (ligulo) èi courteto e que lis espalo de la guèno soun ciliado.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 70 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Festuca
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 6 à 13 cm
Flourido : Printèms - Estiéu

Sòu : Ca
Autour basso e auto : 800 à 2800 m
Aparado : Noun
Mai à avoust

Liò : Tepiero seco - Esboudèu - Roucaio
Estànci : Mountagnard à Subaupen
Couroulougi : Eurimediterrano-Nord-Pountico
Ref. sc. : Festuca laevigata Gaudin, 1808

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.